جمیل احمد

کیا آپ دوسروں کی زندگی کی پیچیدگیاں حل  کرنے میں خوشی محسوس کرتے  ہیں؟ کیا آپ دوسروں کو کیریئر میں آگے بڑھتا ہوا  اور اپنی  مکمل صلاحیت تک پہنچتا ہوا دیکھنا چاہتے  ہیں؟ اگر ایسا ہے تو کیریئر کاؤ نسلر  کے طور پر کام کرنا آپ کے لیے موزوں راستہ ہو سکتا ہے۔

کیرئیر کاؤنسلنگ بہت ہی فائدہ مند فیلڈہے، جس کے ذریعے  آپ دوسروں کو ان کی شخصیت سے آگاہی، کیریئر کے امکانات  تلاش کرنے، اور ان کے پیشہ ورانہ اہداف کے حصول میں مدد دیتے ہیں۔ کیرئیر کاؤنسلر  ایک متحرک کردار ہوتا ہے جو اپنے ذاتی تعلق اور  مہارت  کو کام میں لا کر آپ کے لیے موزوں ترین کیریئر تجویز  کرتا ہے۔

لیکن آپ کیرئیر کاؤنسلنگ کی فیلڈ کیسے اختیار کر سکتے  ہیں؟ اس کے لیے ہم ذیل میں آپ کے لیے چند تجاویز پیش کر رہے ہیں:

1۔تعلیمی قابلیت:

کیرئیر کاؤنسلنگ کا سفر ٹھوس  علم اور تعلیمی قابلیت  کے ساتھ شروع ہوتا ہے۔ ایک  بیچلر ز ڈگری اس کا  نقطہ آغاز ہو سکتی ہے۔آپ  اس سے متعلقہ شعبوں، جیسے تعلیم، مشاورت، نفسیات، انسانی وسائل ،ہیومن ڈویلپمنٹ، کیریئر ڈویلپمنٹ ، اور کمیونیکیشن سکلز کے کورسز کر کے اپنی قابلیت میں اضافہ کر سکتے  ہیں۔

2۔ مشاورت کے فن میں مہارت حاصل کرنا:

اپنے آپ کو صحیح معنوں میں کیرئیر کاؤنسلنگ کی مہارت  سے آراستہ کرنے کے لیے اگر آپ  کاؤنسلنگ یا متعلقہ شعبے میں ماسٹرز ڈگری حاصل کر لیں تو یہ بہت ہی اچھی بات ہو گی،تاکہ آپ مشاورت کی تکنیکوں، تشخیص کے طریقوں، کیریئر کی ترقی کے نظریات، اور اخلاقی تحفظات کے بارے میں گہرائیوں سےاچھی طرح آگاہ ہو جائیں۔ اگر آپ کیرئیر کاؤنسلنگ کے کسی منظور شدہ ادارے سے سرٹیفیکیشن حاصل کر لیں تو سونے پر سہاگہ!

3۔انٹرن شپ اور  مشق:

جہاں کیرئیر کاؤنسلنگ کے نظری پہلوؤں پر عبور حاصل کرنا ضروری ہے، وہاں  عملی تجربہ بھی اتنا ہی اہم ہے۔ تجربہ حاصل کرنے کے لیے اسکولوں، کیریئر کے مراکز، یا نجی حیثیت  میں انٹرن شپ کے مواقع تلاش کریں۔ اس سے  آپ کو حقیقی دنیا کی ضروریات کے مطابق  اپنے علم کا اطلاق کرنے، اپنی مشاورت کی مہارتوں کو فروغ دینے اور تجربہ کار پیشہ ور افراد سے قیمتی رائے حاصل کرنے میں مدد ملے گی۔  انٹرن شپ کے ذریعے آپ کو مزید مواقع حاصل کرنے میں بھی مدد ملتی ہے۔

یہ بھی پڑھیں: کیرئیر کاؤنسلنگ کب ضروری ہے؟

4۔ لائسنس اور سرٹیفیکیشن:

اگرچہ لائسنس یا سرٹیفیکیشن کی ضرورت ہر جگہ نہیں ہوتی، تاہم لائسنس یا سرٹیفیکیشن حاصل کرنا آپ کی پیشہ ورانہ مشق اور اخلاقی معیارات کی پابندی کو ظاہر کرتا ہے۔ یہ آپ کی ملازمت میں ترقی کے امکانات  اور مارکیٹ ویلیو  کو بھی بڑھا تا  ہے۔

5۔ ضروری مہارتوں پر عبور:

تعلیمی قابلیت سے ہٹ کر، کیرئیر کاؤنسلنگ کے لیے مختلف مہارتوں کی ضرورت ہوتی ہے۔ یہاں ہم چند ایسی مہارتوں کا ذکر کر رہے ہیں، جو اس میدان میں آپ کے لیے بہت فائدہ مند ہوں گی:

– سننا: مؤثر طریقے  اور غور سے سننا اور اپنے کلائنٹس  کی ضروریات اور خدشات کو سمجھنا کامیاب کاؤنسلر کے لیے نہایت ضروری  ہے۔

-تشخیص اور جائزہ:  کلائنٹس کو ان کی خوبیوں ، دلچسپیوں اور اقدار کے بارے میں آگاہی  حاصل کرنے میں مدد دینے  کے لیے کیریئر زکی فہرست، شخصیت کے ٹیسٹ، اور مہارت کے جائزے جیسے مختلف ٹولز کا استعمال بھی ضروری ہو گا۔

– کمیونی کیشن: کلائنٹس کے ساتھ بات چیت میں آسانی  اور مؤثر طریقے سے رہنمائی کرنے کے لیےآپ کو  وضاحت کے ساتھ بات کرنے کی مہارت، ہمدردی، اور ثقافتی حساسیت کا خیال رکھنا ہو گا۔

-اہداف کی ترتیب اور منصوبہ بندی: کیریئر کے حقیقی اہداف طے کرنے اور انہیں حاصل کرنے کے لیے ٹھوس منصوبے تیار کرنے کے لیے کلائنٹس کے ساتھ تعاون کرنے کی اہلیت کا ہونا بھی ضروری ہے۔

– ملازمت کی تلاش اور نیٹ ورکنگ کی حکمت عملی: اس مقصد کے لیے کلائنٹس کو مؤثر طریقے سے کام کی تلاش، سی وی لکھنے، انٹرویو کی تیاری، اور نیٹ ورکنگ کے لیے ضروری علم اور مہارتوں سے آراستہ کرنے کی صلاحیت درکار ہے۔

-اخلاقی تحفظات: کلائنٹس  کے ساتھ کام کرتے وقت اعلیٰ اخلاقی معیارات کو برقرار رکھیں،جس میں  رازداری، کلائنٹس کی  رضامندی، اور غیر امتیازی سلوک شامل ہیں۔

6۔ مسلسل اپ ڈیٹ رہنا:

کیریئر کاؤنسلنگ ہر دم متحرک اور تبدیلیوں سے بھرپور  شعبہ  ہے، آگے بڑھنے کے  رجحانات ،ٹیکنالوجیز، جاب مارکیٹ ، غرض ہر چیز تیزی سے بدل رہی ہے۔ لہٰذا اس شعبے میں فِٹ رہنے کے لیے کانفرنسوں، ورکشاپس، پیشہ ورانہ ترقی کے کورسز، اور میدان میں تازہ ترین تحقیق اور پیشرفت سے باخبر رہیں اور  مسلسل سیکھتے رہیں۔

چند مزید نکات:

کچھ اضافی خوبیاں آپ کو کیرئیر کاؤنسلنگ کے میدان میں  مزید نمایاں  کر سکتی ہیں:

-لوگوں کو آگے بڑھتے ہوئے دیکھنے  کا جذبہ: کیریئر کی تلاش کے ذریعے افراد کی رہنمائی کرنے اور ان کی کامیابی میں مدد کرنے میں حقیقی دلچسپی آپ کے لیے بہت ضروری ہے۔

– باہمی تعلقات کی مضبوط  مہارتیں: مؤثر مشاورت کے لیے آپس میں ربط پیدا کرنا، اعتماد کو فروغ دینا، اور کلائنٹس  کے لیے ایک محفوظ ماحول پیدا کرنا  بہت ضروری ہے۔

– لچک اور موافقت: مختلف پس منظر سے تعلق رکھنے والے کئی قسم کے کلائنٹس  کے ساتھ کام کرنے اور ان کی منفرد ضروریات کو پورا کرنے کی صلاحیت بھی ضروری ہے۔

– کام کی مضبوط اخلاقیات اور تنظیمی مہارتیں: کیس سٹڈیز  کو دیکھنا،ملاقاتوں  کا شیڈول بنانا، اور درست دستاویزات تیار کرنا اس  کام کے اہم پہلو ہیں۔

 کیریئر کا آغاز کیسے کریں؟

جیسا کہ ہم نے پہلے بیان کیا، کیریئر کونسلر کا کردار بڑا متنوع اور متحرک ہے، آپ کئی طریقوں سے  کام شروع  کر سکتے ہیں، جیسے:

-سکول اور کالج کے طالب علموں کو مضامین اختیار کرنے میں ، یا کیریئر کے راستے تلاش کرنے میں  مدد دے کر۔

–  سکول، کالج اور پیشہ ورانہ تربیتی مراکزمیں افراد کو نئی مہارتیں حاصل کرنے میں مدد دے کر۔

– سرکاری اداروں  اور غیر منافع بخش تنظیموں میں  ملازمت کے متلاشی افراد اور کیریئر تبدیل کرنے والوں کو رہنمائی فراہم کر کے۔

– پرائیویٹ پریکٹس کے ذریعے  افراد اور تنظیموں کو ذاتی نوعیت کی کیرئیر کونسلنگ کی خدمات پیش کرکے۔

غرض کیرئیر کاؤنسلنگ کا شعبہ نہ صرف آپ کے کے لیے بلکہ آپ سے متعلق دوسرے لوگوں کے لیے بھی  فائدہ مند اور نفع بخش ثابت ہو سکتا ہے۔