جمیل احمد

کیا آپ اپنا کاروبار شروع کرنا چاہتے ہیں؟ آپ  نے بہت سے خواب دیکھےہوں گے، کامیاب لوگوں کی کہانیاں پڑھی ہوں گی اور سوچا ہو گا کہ کیا آپ بھی کوئی کامیاب کاروبار شروع کر سکیں گے؟ لیکن جب عملی طور پر کسی کاروباری آئیڈیا پر عمل کرنے کا وقت آیا ہو گا ، تو الجھن، مغلوبیّت اور مایوسی نے آپ کو گھیر لیا ہو گا۔

بہت سے لوگ کاروبار شروع کرنا چاہتے ہیں لیکن ان کے پاس کوئی ایسا آئیڈیا نہیں ہوتا جس پر وہ عمل کر سکیں۔ ایک تحقیق کے مطابق، 60 فی صد سے زائد لوگ جو  اپنا کاروبار شروع کرنا چاہتے ہیں، اپنی خواہش کو عملی جامہ پہنانے میں ناکام رہتے ہیں—ممکنہ طور پر اس لیے کہ وہ کسی ایک خیال پر ٹھہر نہیں پاتے۔ وہ اتنا سوچتے ہیں کہ ان کی سوچیں انھیں تھکا دیتی ہیں، حتیٰ کہ وہ کاروبار شروع کرنے کا خیال ہی ترک کر دیتے ہیں۔

حقیقت یہ ہے کہ بہترین بزنس آئیڈیا تک پہنچنا جادو کی چھڑی سے ممکن نہیں ہے—آپ کو خود اسے ڈھونڈنا ہوگا۔ لیکن اچھی بات  یہ ہے کہ آپ کو کسی انقلابی، نایاب یا منفرد آئیڈیا  کی طرف جانے کی ضرورت نہیں ہے۔ کامیاب کاروباری آئیڈیاز آپ کو  عام زندگی کے تجربات، ذاتی مشکلات اور سادہ مشاہدات سے مل جائیں گے۔ اصل مہارت یہ ہے کہ آپ کی نظر اس طرف کیسے جاتی ہے اور سوچنا  کیسے ہے۔

اس مضمون میں ہم آپ کو آٹھ ایسے زبردست  طریقے بتائیں گے،جن کے ذریعے آپ اپنے لیے موزوں بزنس آئیڈیا تلاش کر سکتے ہیں—کامیاب کاروباری شخصیات یہی طریقے اپناتی ہیں اور اپنے آئیڈیاز  کے بارے میں شش و پنج   سے نکل کر ایک کامیاب کاروبار کی ابتداء کرتی ہیں۔

تو مزید سوچنے  کی ضرورت نہیں۔ آئیے دیکھتے ہیں کہ آپ اپنے لیے بہترین بزنس آئیڈیا کیسے تلاش کر سکتے ہیں۔

1۔ اپنی مہارتوں اور شوق کو پہچانیں

بزنس آئیڈیا تلاش  کرنے کا بہترین طریقہ اپنے آپ کو سمجھنا ہے—یعنی اپنی صلاحیتوں، مہارتوں اور شوق کو جاننا۔ کیونکہ اگر آپ کوئی  کام پسند نہیں کرتے یا فطری طور پر اس میں اچھے نہیں ہیں، تو آپ کو جلد ہی مایوسی کا سامنا کرنا پڑ سکتا ہے۔ اچھا کاروباری آئیڈیا ڈھونڈنے کے لیے اپنے آپ سے یہ سوالات کریں:

-لوگ مجھ سے زیادہ تر کس چیز کے بارے میں مشورہ لیتے ہیں؟

-میرے پاس کون سی ایسی مہارتیں ہیں جن میں دوسرے کمزور ہیں؟

-اگر میں سارا دن بغیر تھکاوٹ محسوس کیے کوئی ایک کام کر سکتا، تو وہ کیا ہوتا؟

-کون سے موضوعات یا سرگرمیاں مجھے اتنی پسند ہیں کہ وقت گزرنے کا احساس ہی نہیں ہوتا؟

مثلاً اگر آپ کو فٹنس پسند ہے تو آپ  ورزش کے پروگرام بنا سکتے ہیں یا ذاتی ٹریننگ کا کاروبار کر سکتے ہیں،  اگر آپ کو لکھنے میں مہارت ہے تو آپ  کاپی رائٹنگ، بلاگنگ یا ای-بکس لکھنے کا کام کر سکتے ہیں، یا اگر آپ ٹیکنالوجی کے شوقین ہیں تو آپ ٹیک سپورٹ فراہم کر سکتے ہیں یا سافٹ ویئر ڈویلپمنٹ کا کام کر سکتے ہیں۔

2۔ ایسا مسئلہ حل کریں جس کا سامنا آپ نے خود کیا ہو

کئی بہترین کاروباری آئیڈیاز ذاتی طور پر مشکلات کا سامنا کرنے سے ذہن میں آتے  ہیں۔ سوچیں کہ آپ نے کب کسی مسئلے کا سامنا کیا اور آپ کو لگا کہ “کاش اس کا کوئی آسان حل ہوتا!”

مثلاً Spanx کی بانی سارا بلیکلی نے ایک ایسا ملبوس تیار کیا جو خواتین کے لیے زیادہ آرام دہ ہو۔  Airbnb کے بانیوں نے مہنگے کرائے کے گھروں  سے پریشان ہو کر متبادل پیش کیا۔  Warby Parker اس لیے بنا کیونکہ چشمے حد سے زیادہ مہنگے تھے۔

3۔ مارکیٹ میں گنجائش  کو دیکھیں

کئی بہترین کاروباری خیالات کسی نئے تصور پر مبنی نہیں ہوتے بلکہ ایک ایسی جگہ کامیاب ہو جاتے  ہیں جہاں پہلے سے موجود حل کمزور ہوتے ہیں۔

مثلاً  Dollar Shave Club نے مہنگے ریزرز کے مقابلے میں سستا اور آسان ماڈل متعارف کروایا۔  Uber نے روایتی ٹیکسی سروس کے نقائص کا حل نکالا۔

آپ ایک دلچسپ کام کر سکتے ہیں؛ Amazon، یا Daraz پر مختلف مصنوعات کے منفی ریویوز پڑھیں اور ان میں موجود مسائل کو نوٹ کریں۔ پھر دیکھیں کہ کیا آپ ان میں سے کوئی مسئلہ حل کر سکتے ہیں؟ اس پر اپنے کاروبار کی بنیاد رکھیں۔

4۔ابھرتے ہوئے رجحانات سے فائدہ اٹھائیں

اگر آپ کاروباری دنیا میں آگے بڑھنا چاہتے ہیں، تو اس پر نظر رکھیں  کہ مستقبل میں کیا ہونے والا  ہے۔

مثلاً AI اور آٹومیشن تیزی سے مقبول ہو رہے ہیں—کیا آپ ان سے جڑا کوئی کاروبار شروع کر سکتے ہیں؟  ماحولیاتی تحفظ کا رجحان بڑھ رہا ہے—کیا آپ کوئی ماحول دوست پروڈکٹ بنا سکتے ہیں؟

5۔پہلے سے کامیاب ماڈلز کو بہتر بنائیں

آپ کو ہر کام نئے سرے سے  کرنے کی ضرورت نہیں۔ کامیاب ماڈلز کو بہتر بنا کر اپنے لیے راستہ  بنائیں۔

مثال کے طور پر پہلے سے موجود کسی پروڈکٹ کو نئے انداز میں زیادہ سستی قیمت پر پیش کریں ، پروڈکٹ کا معیار زیادہ بہتر  کریں ،کسی مخصوص مارکیٹ پر توجہ دیں ،یا اپنی  کسٹمر سروس دوسروں کے مقابلے میں زیادہ بہتر بنائیں۔

6۔ اپنے نیٹ ورک سے رائے لیں

آپ کے دوست، رشتہ دار اور آن لائن کمیونٹیز  سے ایسے مسائل پر تبادلۂ خیال کریں  جن کے حل کی انہیں اشد ضرورت ہے۔

مثلاً لوگوں سے ان کی پریشانیاں پوچھیں، اپنی کمیونٹی سے سروے کریں، سوشل میڈیا پر پوچھیں کہ “کون سا روزمرہ کا مسئلہ ہے جس کا آپ بہتر حل چاہتے ہیں؟” ۔

7۔ اپنے مشاغل اور سائیڈ پروجیکٹس پر غور کریں

کئی کامیاب کاروبار مشاغل، سائیڈ پروجیکٹس، اور جنون کے نتیجے میں  ابھرتے  ہیں۔

مثال کے طور پرآپ بلاگنگ سے مواد لکھنے کے  بزنس کی طرف آ سکتے ہیں،  فوٹوگرافی سے  آن لائن فوٹو ایڈیٹنگ  کے امکانات پر غور کر سکتے ہیں، گیمنگ سے  اسٹریمنگ یا کوچنگ، اور  ہینڈی کرافٹ  سے ہینڈ میڈ پروڈکٹس کی فروخت پر توجہ مرکوز کر سکتے ہیں۔

8۔ چھوٹے اقدامات سے آغاز کریں

مثال کے طور پرسائیڈ بزنس  شروع کریں، کسی شعبے میں فری لانس کام کریں، کم سے کم وسائل سے ایک آزمائشی پروجیکٹ  بنائیں، یا فائیور اور اپ ورک جیسی مارکیٹ پلیسز پر آزمائشی کام  کریں ۔

خلاصۂ کلام

اگر آپ سوچ رہے ہیں کہ “میں کاروبار شروع کرنا چاہتا ہوں، لیکن میرے پاس کوئی آئیڈیا نہیں” تو سب سے اہم قدم سوچنے سے آگے بڑھ  کر عمل کرنا ہے۔ ضروری نہیں کہ بہترین کاروباری خیالات ہمیشہ کسی انقلابی ایجاد سے پیدا ہوں، یہ آپ کے  عملی اقدامات، مشاہدے، اور تجربے سے سامنے آتے ہیں۔

لہٰذا سوچنا کم کریں، اور کوشش زیادہ کریں۔ ہر کامیاب کاروباری شخصیت کسی نہ کسی وقت وہیں تھی جہاں آپ آج کھڑے ہیں—لیکن انہوں نے پہلا قدم اٹھایا، سیکھا، اور آگے بڑھتے رہے۔

اب وقت آ گیا ہے کہ آپ بھی پہلا قدم اٹھائیں!